Donk, konm moin la di azot lo shate la désid fé la rishèss son mètr, dèrnyé garson moulèr mayi é pou fé sa, konm i di, li la fé la rankont lo roi é li l’apré karèss lo roi dann sans lo poil pou donn ali lo méyèr idé dsi son jenn mètr, zanfan moulèr mayi konm moin l’apré di azot doi listoir la komansé.

L’avé inn foi pou inn bone foi mésyé lo foi la manz son foi avèk in grinnsèl.

Apré k’li la fine fé kroir mésir lo Roi, gran-gran karo mayi i apartien mésir Émé, épi galman lo gran park zanimo épi ankor d’ot rishèss mi rapèl pi tro bien ala lo shate i ariv dovan in palé :sa lé gran, sa lé o, sa lé zoli avèk in zardin otour près konm palé d’Vèrsaye .Mi di pa zot konm sa lé éstra.

Kriké ! Kraké ! Kriké Mésyé ! Kraké Madam !

Lo shate i rant dann shato-la.Li pass partou d’dan konm in moun i vien vizité.Mé sak li koné pa sé ké shato-la i apartien l’Ogr, kon m tout propriyé tou otour : gran gran karo mayi, gran park zanimo, lélvaz poisson..Li lé rish koman don ! Lo shat san sousi i pass partou,dann salon, dann bann shanm, dan la kizine, li sava oir mèm l’ékiri épi lo bann garaz.Ala lo l’ogr i bite dsi li.i di ali : « Kosa ou i vien fé la, spès vilin mimi ? Ou i vé mi manz aou vèr é sèk ou la ? »

Lo mimi i di ali : “ A ! Ou i vé manz amoin ! A !ou i fé lo for é talèr kan lo roi v’arivé avèk son bann solda avèk fiziy kosa ou va fé ?lo for ankor ? Ou na intéré détalé pars avèk lo Roi out for va kass par boute ! »

Kan le l’Ogr i antan parl lo roi, fizy, solda, kanon pétète tousala la pèr i mont dsi li.Kap kap li gingn !li sava pou sové.Lo shate i koné l’androi i di ali : « sov aou, pass par pti pon d’boi an-ola épi rèss kashyète ziska lo roi la fine alé. ».Le l’ogr sé d’sové, é kan li pass dsi pti pon d’boi, lo pon i kass, li tonm otanba é kasé son kolé, mor définitivman.Lo shate lé kontan :astèr son mètr lé rish pou vréman. Avèk tout lo bien l’ogr zot i konpran si li lé rish toulbon.

Kriké ! Kraké ! kriké Mésyé ! Kraké Madam !

Donk lo roi avèk son konvoi i pass dovan lo shato.lo shate i salué lo kortèz avèk son gran shapo é li fé rant lo konvoi , konmsi i li lé propriyétèr l’androi.Lo roi i domann : « Mésir Mimi : kisa i lé shato-la ? Sa ankor shato mésir Émé sa. ? »

Lo mimi i aprouv.Lo roi lé plin l’admirasyon é kan i rant anndan li apèrsoi son palé koté shato-la dizon kalban o koté la kaz lo mètr.Lo roi i rant :manzé lé sèrvi, boisson an poundyak, flèr tout koulèr an bouké partou.Tout lo konvoi i manz , i boir , i amiz la fiy lo roi i pass son tan koz avèk troizyèm garson moulèr mayi.A ! final de kont lo shate lé fyèr sak li la fé.

Koton mayi i koul ! rosh i flote ! L’avé inn foi pou inn bone foi mésyé lo foi la manz son foi avèk in grin sèl.sinkyèm morso la fini sizyèm morso I vien tanto.