Bien bon !Mé pou kossa mi rakont azot kékshoz konmsa ?Pars figuir azot mi sort pass dann in-dé libréri, pou moin trouv in liv listoir La Rényon an band déssiné-la bien anparl de sa sé tan si. Alor figuir azot kan wi antann parl kékshoz konmsa dann télé, final de kont wi knpran sak wi vé,é sirtou sak ou l’apré rodé.. Mwin pèrsonèl sak mwin l’apré rodé sé band déssiné biensir, avèk inn parti an kréol épi inn parti an fransé, dsi listoir nout péi La Rényon.

Elas, Ménélas, mon kèr lé an filass !Mwin la trouv listoir la Rényon an band déssiné, mél o bann kozman lé an fransé.Mwin na poin arien kont lo fransé mé mi antann dir nou néna dë lang, donk mi rode in partaz zist é éskiz mon pardon mé mi trouv pa.. Lé vré sète ané mwin l’ashté dë band déssiné, inn dsi bann zanfan La creuse épi l’ot an gro dsi la guèr 14, l’avé in bonpé kozman dan la lang kréol rényoné. Mwin la vi d’ot galman, mé asoir-la kan mwin la pass dann la libréri mwin la viv in kazi-invazyon.Mon santiman ? lo liv péi lé konm lo paté zalouète :in zalouète avèk in shoval.Lo zalouète pou la lang kréol rényonèz, lo shoval pou la lang fransé.

Mwin la pa ashète arien,mwin té paniké par sak mwin la vi .Pou anshèv èk mwin moin la parti ashète i laparèye pou létandaz linz.MWin la gingn, in bone afèr mi pans mé kan mwin la parti péyé, lo tantine té a la kèss bien zantiman la done amwin in tiké avèk in kado sis éro-sis éro 74- pou vnir shèrché dimansh. Mwin la di : wi vé dir ziska dimansh ?La réponnd amwin non,dimansh solman.Mwin lété prèss Ko épi mwin la di :Madam wi vé mi trayi labolisyon lésklavaz pou sis éro.Non, la pa vré ! Aprésa mwin la parti émwin la antann lo bann moun té la apré kakaye de rir dann mon do.

.Dan la ru in paké d’moun étout bann jenn téi koz kréol.Mwin la roprann favèr in pé, mé mwin lé sir asoir dann mon li mi sava fé koshmar, mové rèv. Sirman in bèl fransé bien blan bien roz apré trang in pti kréol maling, fonsé bien antandi, la lang i sort déor si tèlman li l’apré tranglé..Li sar aval son biltin d’nésans.. Mwin lé sir m’arévèye d’in kou. Mon kèr va bate dann mon do.M’a koshmardiz la fin lo mond kréol l’arivé.

Georges Gauvin