Gran zèrb, la pou anvayi a nou. Mwin la pa tousèl pou di sa. Mon kamarad osi. Li di a mwin, lé vré vré mimm, partou lé parèy, partou lé komsa, sof an plin vil, i pé alé inpé. Antouka, dann lo rézyion mi lé, sétin dézolasyion war sa. Dann kivèt, si bor somin, si bor kat voua, dann ron-pwin, zèrb mimm, zèrb mimm. Désertin zandrwa, zèrb i fé talèr, dé mèt otèr ! La Rézyion èk Départman i koup pi, lé paréy la zingl. Si télman, lo bann zéli i vé, zot i guign organiz in « zoué lo kasièt » dédan.

Di pa mwin oté, bann kittamèr là, lé kapab trouv 3 miliar pou fé in gran rout si la mèr, zot lé pa fouti dégaz in katsou pou fé in nétoyaz zèrb, anplis par plas, riskab na lo ra i pép dédan. Lo pli komik, dan lo zistwar, zot i sar zèt in tonn larzan, la-ba péi déor an piblisité, pou di Zoréy, Sidafrikin, Sinwa, vyin war nout ti péi koman lé zoli ! Mé foutor, kom di mon kamarad, avan alé rod do moun, pou manz out kaz, komans par lav out zasièt krouté !

Mé, kèk fwa mi pans osi, mi di Mondyié Sénir, pétèt bann présidan là, èk lo pov bann zéli, zot i koné pa aryin. Kom la plipar d’zot i roul sélman dann gro loto, èk vit fimé, riskab pétèt zot i wa pa déor. Lé posib vréman.

Dikou, mi pans in sistèm, kom koméla i fé in sié konkour : konkour « lo pli zoli zardin », konkour « lo pli zoli byé d’bwa », ou ankor konkour « lo pli zoli marsé », ébin à koz pa maziné in konkour « lo pli zoli gran karo d’zèrb ». Sa, i sré in bon zafèr, pétèt, pou fé bouz inpé bann zozo là.

Pol