Médam zé Méssyé, la sosyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami, mi koné pa si zot lé konm mwin -an dézord konm mwin mi vé dir- é mi pé dir azot dann mon vi pti pé lo tan mwin la pèrd. Lo tan, konm i di, sé larzan é si wi pèrd lo tan wi pèrd larzan.

Kan ou lé an ord wi réspèk out bann priorité wi réspèk galman fé out bann démarsh a tan. Mé L’èr-la, mi vé pa anparl demoun i gingn dé shoz par shanss pars pou banna na pwin ni lord ni dézord, in kou d’shanss sé tou.

Mé si wi baz pa dsi la shanss mé dsi lo travaye, la lé sir ou la bézwin ète an ord é l’ord sé lo frèr-la sèr la proprété. Konbien foi wi ariv la kaz in moun é li lé akablé par lo dézord é la salté, ébin wi pé dir larzan i trouv arpa la plass pou li rantré.

Alé ! Mi lèss azot rofléshi la dsi, mi lèss azot kalkilé, é ni artrouv pli d’van. Sipétadyé.