Moin l’a gaingn’ fleurs z’ordi
Pourtant l’était pas mon l’anniversaire
Ni in aut’ jour spécial !

Hier soir dans la nuit’ pou in premier fois li l’a disput’ ec moin
Li la dit beaucoup d’méchancetés que l’a bless’ à moin vraiment

Mi connaît qu’li lé désolé
Qu’li l’a pas vouli dir à moin tout ça
Parce que li l’a envoye fleurs pou moin !

Moin l’a gaign’ fleurs z’ordi
L’était pas mon l’anniversair’
Ni in aut’ jour spécial !

Hier soir, dans la nuit’ li l’a pouss’ à moin cont’ le mur
Li l’a commence trangle à moin, l’était comm’ in cauch’mar
Mi croyait qu’l’était pas vrai, et grand matin quand m’a l’a réveillé,
Mon corps l’était tout en douler’ !

Mi connaît li lé désolé
Parce que li l’a envoye fleurs pou moin !

Moin l’a gaign fleurs z’ordi
L’était pas la fête des mères
Ni in aut’ jour spécial !

Hier soir, dans la nuit’, li l’a arcommence tape à moin
Coup d’pied, coup d’poing, pli fort que d’habitude
Si mi quitt’ à li, quo ça m’a devenir ? qui ça va occupe mon z’enfants ?
Où ça m’ trouv’ l’argent, li fait peur à moin, moin l’a peur quitt’ à li !

Mais mi connaît li doit êt’ désolé
Parce que li l’a envoye fleurs pou moin z’ordi

Moin l’a gaign’ fleurs z’ordi
Mais z’ordi c’est in jour spécial
Z’ordi c’est le jour mon l’enterre’ment
Hier soir , dans la nuit’ li l’a tell’ment tape à moin
Qu’li l’a fini par tuer à moin.

Si seul’ment moin l’avait trouv’ assez courage pou moin quitt’ à li
Moin n’aurait pas gagn’ fleurs z’ordi !............

Claude Vinh San
(inspiré d’un poème de Cynthia M. Beaudoin)