Nout zansèt lété Gauloi,
Malbar, Zarab, Yab,
Kaf, Malgash, Shinoi.
Zordi, kisa nou lé ?
Okilé nout lidentité ?

Nout zansèt lété Gauloi ?
Sa ! Mi kroi pa !
Mon gran-pèr
Koté mon momon lété Shinoi,
E mon gran-mèr
Koté momon lété Zarab,
E moin ? Kisa mi lé ?

E ou ? Kisa ou lé ?
Moin ? Mi koné kisa mi lé :
Moin lé tout so bann ras mélanzé
Ke la débark isi pou trouv travay.

Nout zansèt lété Gauloi ?
Néna in pé d’sa, mé solman,
Moin lavé in tonton ke lété blan
Ek shové konyé.
Moin néna dé zenfan :
Néna inn, lo zié lé gansé,
Lot la po lé la koulèr kafé.

Dépi lontan nout tout lé mélanzé.
Alors, zordi, pran prékosion
Kan ou di Kaf néna vilin manyèr
Lo Yab lé vilin, li lé tro blan !
Zarab, Malgash, Shinoi
Sa domoun lé kont nasion !

Nout zansèt lété Gauloi ?
Sa ! Lé pétèt in pé vré !
Mon gran-pèr
Koté mon papa lété Malbar,
Mon gran-mèr
Koté mon papa lété in Yab,
E moin, kisa mi lé ?

Zordi, kan néna kréol i désot la mèr
Kan zot arvyin, zot i koné pi
Lo gou rougay sosis,
Zot i koné pi lo gou piman,
Zot i koné aryink lo gou kokakola èk
Ponm do tèr frit ! Zot lé pi kréol !

Zot lé Zoréol !
Zot la ronyé zot lidentité !
Alors, kisa zot i lé ?
Zot minm zot i koné pi
Kisa zot i lé !
Zot i fé pityé !

Moin, mi koné kisa mi lé !
Mon bann zansèt lété mélanzé
Ek lo blan, lo kaf, lo malbar,
Pétèt èk lo malgash, lo shinoi osi,
Mé mi kroi byin ke mi lé
Tout so bann ras mélanzé !

Mé solman, mon lidentité artrouvé,
I empèsh pa moin koz la lang Fransé,
Tamoul, Shinoi, zarab, Malgash...
Ansanm lo kréol Rényioné !
I empèsh pa moin dans lo salsa,
Lo rock, lo zouk, lo séga èk lo maloya !

Dan tousala, mi ronyié pa mon pasé.
Zordi mi konsidèr tout la tèr lé mon péi :
Leurop, Lafrik, Lazie...
Zordi mi konsidèr ke mon konsians lé planétèr,
An plis ke sa, moin lé Rényioné(se)
Aryink pou sa minm, vréman moin lé fyèr(e) !

Gabrielle Marie