Nout Listoir té long, ranpli la soufrans
Mé li la fé nésans
In flèr Lotus, la sort dann fénoir
Nout Viv-ansanm i klat an bardzour larkansièl

Nout Viv-ansanm sa nout zarlor èk nout fierté
Sa léritaz nout bann zarboutan
Parèy in trofé aprè tout bann batay
Pou la liberté é pou nout domounité.

Nou lé pa plis nou lé pa moin
Anou osi nou lé kapab
Tras nout prop somin, sa t-anou sa !
Nout pèp rénioné la fé sa !

Nout Viv-ansanm sa nout zarlor èk nout fierté
Sa nout patrimoine, nou doi protèz ali
Sa minm nou gingn kado limanité
Lapou kapot dan la barbari.

Nout Viv-ansanm sa nout zarlor èk nout fierté
Astèr, nout devoir sakré, sé mèt ali anlèr
Parèy in bouké lèspérans pou domin
Kom in fanal pou bann génération i lève
Et ke lé kapab osi amont lo monn antié
Somin linité èk la fraternité.

Idriss Issop-Banian