Nout tout’ i koné kosa i lé lo ra. Sé inn ti mamifér ronzér, gran ké, mizo pointi. Li lé kapab donn a ou maladi la pés, ou ankor lestospiroz ki pé kinn a ou. Mé sirtou, alé pa konfonn a li èk nout « ti-mizo », sak bon pé an parmi nou, i an rafol an karry fé d’boi ou an sivé, ziska liss lo doi. Désertin, i apèl ali « tango ».

Konfonn sirtou pa ! Pou anrovnir lo ra, li mimm, askiparé, néna in tralé léspés. Lo p’ti-modi, lé koni osi pou son kalité fité. Lo ti kitsamèr lé kapab béz out manzé, si ou la bat’ lo zié. Sé in pé pou sa mim dawar i di souvan, pangar lo ra dann magazin.

Lé vré mimm, lo ti bébèt zanimo lé kapab rant partou. Lot sominn, moin la tandi, par koté Rivir-dé-Ross, lo mèr la komine la ferm in lékol, akoz marmay la tom si ra dann kabiné ! La astèr, i parék koté Sintandré, noré in kalité lo ra, ki rant ziska dann frigo lo kantine santral ! Sa, moin la pa invanté, sé lo mér li mimm, an personn, la di. E figuir à zot, pou anpès lo bann ra, anbark manzé marmay, lo mèr la trouv in tik-tak zénial. Li la di astèr, li va mét gro kadna partou, galman d’si tout’ frigo, va war si zot i rant akor dédan ! Oté, Zamé d’mon vi, moin la tandi in zàfèr komsa ! Mon kamarad osi paréy.

Mé aprè byin réflési, mon kamarad i di a moin, pou guign rant dann frigo, sa dawar in bél kalité lo ra, in léspès éspésial. Lo sél solision i rèt lo mèr, sé apèl vitman l’ARS, ou alor lo FGDGON pou aplik in bon lexterminasion, sinonsa lé fouti, lé mal baré ! Talèr, lé riskab na pi manzé pou marmay lékol. Mé an atandan, mon kamarad i di a moin, pourvik, dann lo kuisinn Sentral, na poin in kof-for ! Lo ra lé riskab okip a li.

Mé, lo pli zoli, lo nouvél la fann partou, dann Sintandré, mon kamarad astèr la pér. Li osi la parti rod kadna pou son frigo. Oki kadna, dann magazin la pi, la fine vann tout’. Tousa pou in zistwar lo ra !

Pol