Somenn pasé moin la trouv in moun mi trou kan l’ané néna 366 zour a popré.Moin la konète ali dann tan isi La Rényon l’avé in gran bataye pou maloya sort dann fénoir épi pass dan la limyèr. Moin té kontan trouva li, é pé s’fèr li ogalman té kon tan rotrouv amoin.Déza in n’afèr, li koné moin lé ankor vivan é mi koné li osi lé ankor an vi .

Moin lété étone pi trouva li dann bann manifèstasyon politilk épi sindikal.Donk moin la domann ali si li té parti dann péi déyèr solèye é li la di amoin non ;li la rèss La Rényon é pa in sèl kou li la sort isi pou alé dann péi déor Moin la dmann ali si na son tras dsi lo fasbouk, li la di amoin si.Oté lé ga ! La Rényon lé pti é lé gran an mèm tan pars koman nout dé li la pa nyabou bite ansanm-avèk dopi tout tan-la ? Koman nou la fé pou fé konm solèye épi la line san trouvé kansréti in sèl foi.Mistèr é ponm tèr !

Nou la diskite in pé épi li la fini par dir amoin li okip pi la politik.Astèr moin la domann ali si li lé sir kan ou lé dann in péi konm la n’ot, lé posib pa okip la politik é okip solman la kiltir.Dabor toulmoun i di pa :si ou i okip pa la politik, la politik lé rsikab okip aou.Ni pé di,in l’anj la pasé... Pars pou moin la politik san la kiltir é la kiltir san la politik sa lé pa posib.

Par shans moin la touzour lir Témoignages, épi moin la touzour siuiv défoi do pré défoi in pé moins, lo bann zaksyon épi lo bann zidé nout parti.ala pétète lo sèl parti i asosyé bann rovandikasyon politik, avèk bann rovandikastyon sosyal,néna in politik kiltirèl épi in sèktèr inportan dann la défans l’anvironeman-dizon la lite kont lo dézord klimatik. Boudikont ni pé dir lo sèl parti koéran dsi la sène politik La Rényon...Lé zot, plito In bann porte-klé bann parti déor !

Justin