Zordi lané y komans, mi ékri dé pti mo pou fé prann consians, ou sa nou lété, ou sa nou la fini arivé, koman ni doi kontinié.

Si zordi La Réynion nout zoli péi la avansé, sé grass a nout bann zansyin ke la mènn la lite é la mèt nout péi doboute, nou obli pa sa, nout bann militan, lo bann fanm, lo bann zonm, plantèr, dockèr, somin fèr, somèr, la gingn lo kou, lété matraké, mé la tyinbo ansanm, la tou fé pou mèt bann kolonyalist déor, la gingn kan mèm avansé èk nout péi départemental.

Mé zordi i fo byin voir la situasion an fas, parfoi ni kroi ké lo bann kolonyalist la disparèt, mé lé pavré, banna lé ankor la, solman lé sou in not form. Fé antansyon mon bann Réynioné, révèy azot banna lé touzour la, mi apèl sa “kolonyalist moderne”. Kan bann goyav de France i vyin dan nout péi pou rann a nou vizit, i di banna lé vni pou ékout anou, pou koz èk nou, pou konprann nout problèm, alé voir sé pou pinn nout figir, oubli pa sa. Zordi sé touzour lo bann kapitalist i diriz anou mé gard pa koman, zot lé kasièt dérièr in dra, ek dé troi fil, i tir si lo fil é i fé koz lo bann marionèt péi… (azot mèm dévinay kisa ilé ?!)

Lo bann radio i bour nout krane èk zot bann mo kompliké ké nou konpran pa trobyin, y fé tonm anou dann pièz lo mo. Lo bann gro zournal osi kan mi lir an diré ke zot i manipil anou, lo bann paz lé zoli, mé zot i ésèy touzour konbat anou.

Dan so konba zot i utiliz sertin zélu ke nou la mèt nou mèm an lèr é ke nou la akèy bra ouvèr. Gramoune lontan la di “Agard pa loizo par son plimaz” , sa lé vré sa, i fo réfléshir a dé foi avan donn nout konfians. Ma donn azot in not èkzamp, mi pran lo pié salad : kan ou i ashté ali, lo pié lé gro lé zoli, lé byin pomé, lé pa piké ditou… mé kan ou nétoye ali, sirpriz !... shéniy ver lé dan lo kèr, i kasyèt dann milié pou manz lo kèr é kroi moin si ou fé pa in kont li détrui lo gro salad ! Mi kroi nou militan, i fo vréman ni réfléshi la dsi, granmoune lontan té i di pa osi “Nouri pa lo ver pou pik nout kér”  ?

Mi di a mon bann kamarad militan rouv nout zyé, arèt fé manipil anou, pans lavnir pou nout pèp, oubli pa ousa ni sort, ousa nou la fini arivé, koman i fo kontinié avansé pou rézisté kont bann kolonyalist moderne.

2012 lé in nouvo lané. Alon bouzé pou savir tou sala, la lit i kontinu.

Ninine Michaud