Dopi kéktan, dann somin, dann zournal, dann radio Gro-Monmon, partou, toultan, i koz ryink Sintandré èk Vira. Sintandré par-ci, Sintandré par-là, Vira par-ci, Vira par-la. Bon pé i di, zot i komans èt fatigué, antann toultan, Sintandré an védèt. An o d’lafis, kom ki diré in sanson. Mi koné pa si néna inn i grat tiboi, mé si sé lo ka, i fo arkonèt son zafèr na lèr byin fonksioné.

Tou lé zour i antan, koméraz la kantinn la pa bon, fromaz lé gaté, sinonsa lo problèm do lo sal robiné, après sé lo pansion maron pou vié moun, épi ankor tangaz Vira sam Didier. Néna in takon zafèr ankor. Ousanousava ? Arèt in pé siouplé ! Mé mon kamarad i di a moin, fopa kroir sé sélman zordi ki koz insié Sintandré, dopi sinkantan lé komsa, dopi sinkantan li lé promié anlèr, dan lo itparad !

Astèr mi ansouvyin pou do vré, lépok gro frod élektoral, zéleksion anilé inn si lot, dann tan défin Loran, mimm lontan avan. Mi rapél ankor Vira èk son larmé king-kong. Mimm la-ba, péi la fré, té ki koz sa. Zournal té ki koz osi bon pé lo lotél flotan, dann fon létan Kanbiston èk la plaz « Sanborn-lé-Bin ». Tousa té bonpé lo van. Epi navé ankor lo vol kof-for la méri ék in takon larzan CES, san konté radio Gro-Momon té ki parl do lo pou vann péi zarab. Mi gingn arpa arkont azot tout’ zordi, akoz i fodré lo zournal pou moin tousèl.

Mé tousala la pa bon, i ral Sintandré dérièr, dann dann gro fénoir. Rézman, in foi lané, néna Dipavali i amèn inti limir pou klèr lo ténèb la vil. Antouka, na in soz lé sir, domoun, zournal, radio Gro-Monmon, la pa fini koz Sinandré èk Vira. Mé tansion pangar. Aforstan ét an lér lafis, ou fini in lèr par pét à tèr.

Pol