Mi sava rakont azot in z’istoir, in zistoir vré bien antandi. Sa i éspas dann komansman bann z’ané soisant. Sa i éspas dann l’Algérie zis apré bann z’akor la sign la-ba Evian… zot i koné bann z’akor-la la rokonète l’indépandans pou l’Algérie.

Donk moin lété la-ba, pou alé konm i di zordi dann in misyon imanitèr dann in formasyon bann moun té apré aprann lo métyé d’amontrèr d’lékol. L’avé dann formasyon-la in bann jenn-fiy épi in bann jenn – jan. In bonpé l’avé partisip la gèr l’indépandans, in pé lété tortiré, in pé lété blésé, in pé l’avé fé bann konba difisil. Mi di azot franshman moin téi san amoin pti koté zot par raport z’ot parkour épi la myène.

Mi souvien d’in jenn bononm. Li l’avé fé z’étid an syans imène-sosyoloji si mi tronp pa !- é dann tan la gèr libérasyon li lété lo shèf in détashman. Dann son détashman l’avé dé ga té i vé absoliman batay. Li di li la kalm inn, mé pou l’ot arien a fèr. L’èrla li la fé amar in bra lo boug té an ké d’bèf, déyèr son do épi li la di : « Vien fou in kou tou lé dé ! ». Lo ga la di : « Shèf, la pa zis ! Out dé bra lé lib é moin, moin na in bra amaré… Forséou va tap amoin ».

Li la fé pou répons : « Sak mi fé la, sé pou amontr aou kan na in konba pou améné é si lo bann ga i dispite épi i sobate dann détashman, zot i afébli la lite é zot i ède bien lo z’ènmi ». Kisa i ri dann in ka konmsa ? Sé lo z’ènmi, lo z’advèrsèr si zot i vé bien. Kan ou na in lite pou améné, tout kont lo z’advèrsèr, é tout pou ède out prop dalon. La pa kont out dalon k’i fo vanjé… Aprésa ziska la gèr la fini, li la mète lé dé ga inn avèk l’ot, inn pou ède l’ot, inn pou avèy dsi l’ot é d’apré li sa la bien éspasé. Mi pans li la pa di amoin tout, pars la gèr sa la pa konm dann in lite politik normal. Na dé foi, ou la poin lo shoi.

Nb Kisa mi aviz ? Pèrsonn é désèrtin an mèm tan. CQFD (ce qu’il fallait démontrer) o-sinonsa SKFA (sak té k’ i fo amontré)