Dann in zournal zordi (lindi 10 sèptanm) an promié paz, so zournal i parl « lo gran ménaz bann parti ». Sat mi aprésyié pa sé lo gran balé, kom par azar zist à koté Paul ek Elie. La i sa va vréman tro loin. Oté, domoun ke la désidé sa la soizi so balé la, kisa zot i lé zot ? Ou sa zot i sort ? Zot i koné nout passé ? Zot lé la pou kosa ? Pou défann Rényoné ou byin pou kass Rényoné ? Zot y défann kisa zot ? Pa lé maléré byin sur, parské kan mi wa sa, mi di k’zot lé la ryink pou anbrouiy léspri domoun.
Kisa zot i lé zot pou donn a nou dé leson ? Zot lé poussé par ki ? Dan zot manièr zot lé an trin d’fé avèk nou, zot i vé pa ké La Réunion i avans, zot i vé ke ni rèst touzour la pou di oui, oui mésié. Mé la fini so tan la, arèt èk sa, nou vé kontinié nout somin ke nout bann zancien la trass po nou. Ni vé osi ke domin La Réunion lé kapab avansé pou lavénir nout zanfan, arèt in pé èk zot manièr de kroir ke zot pansé lé méyèr k’la not. Arèt kass a nou, èk zot lékritir, La Réunion y avans pa èk zot…
Arèt èk tou sa la. Nou lé pa plis, nou lé pa moin, rèspèkt a nou. Zot i vé balaiy lo PCR èk lo pèp réunioné ? Zot i gingnera pa !

Ninine