Matante Zélida la ékrir Justin :
Mon shèr nové, mon spès salté, rouj de fon dovan léternité,
Vi koné, yèr midi, moin la pans aou, pa tro an bien, mé vi koné koman mi lé : bann rouj de fon, sa mi èm pa tro. Alor, pou kosa moin la pans aou épi tout out bann konjénèr ? Pars zot i èm krétik mésyé Didier pou son program, pou son rézilta épi pou tout, si vi oi sak mi vé dir. Bin figuir azot, mi mèt mon télé dsi Rényon Promyèr zis a tan pou antann : lo shif di zour, sé 3. So kou si, mi pans zot va ranval zot vénin. Pars lo troi, sé troi pou san. Sé la goumantasyon lokipasyon bann shanm lotèl moi d’mars par rapor lo moi d’mars 2012. Alor, mi kont dsi ou pou di ankor in kou, la politik mésyé Didier, sé pa in bon politik, é ké lo gaspiyaz i ansèrv de riyin, é patati é patata. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin lé bien kontan antann aou koz konm sa. Mi konpran bien ou la ékout Rényon Promyèr, é mi pé pa roprosh aou, mé rant dir tout la vérité é solman in pti bout nana in diférans, é sé so diférans-la ké, sanm pou moin, ou la pa sézi. Pars si i rogard bien tout lo bann ransègnman, lé vré, moi d’mars na in goumantasyon, mé apré dé dérogoumantasyon moi d’zanvyé épi févriyé ; donk si i pran tout lo trimès, bin la frékantasyon bann lotèl la diminyé kat pour san par rapor promyé trimès 2012. Ala in gran viktoir an vérité ! Si ni ranport bann viktoir konm sa, nou lé sir nou lé dsi lo bon shomin. Zistoman matant, l’IRT i sort gingn ankor sink milyon l’éro an plis pou son bidzé. Sink milyon larzan piblik, é sa i trouv pa d’sou la pat shoval par lo tan ki kour. Sof mon réspé, mi pans sa sé pa in larzan bien plasé, pars in larzan bien plasé sa i raport gro. Sé pa lo ka ziska zordi. Si ni kont dsi lo tourism pou tir anou dan la mizèr, nou lé vréman mal baré. Tok ! Pran sa pou ou !

NB : Par l’fèt, matant, moin la vi dann télé, mésyé Didier la parti lo féstival de Cannes, sirman konm anbasadèr La Rényon — i di mèm konm anbasadèr lo sinéma rényoné. Na oir kosa k’i ansèrv ou sansa ni oir ar pa, pars i fé pa zamé lo bilan, donk i koné pa kouk i ansèrv. Sak moin lé sir, sé ké Didier la parti avèk in délégasyon, é sirman li épi son délégasyon la pa di frékant bann lotèl in zétoil ou san zétoil... é lo faktir lotèl té i dové èt karabiné, konm lo faktir réstoran. Mé trakas pa nou, in foi an plis, ni konétra pa konbien sa la kouté. I paré sa i rogard pa nou !

 Justin