« Aforstan frékante lo shien, i gingn lo piss »

Mézami, mon bande dalon, mwin lé sirésèrtin zot i koné kozman-la pars mon zénérassion i koné sa, zénérassion mon zanfan i koné galman, sète mon bande pti zanfan i komanss aprande.

Kossa kozman -la i di ? Lé pa bézoin d’ète pli fité ké fité pou bien konprande ali :frékante demoune néna vilin défo ou lé riskab armass lo bande défo. Armark azot bien :bande vyé l’anssien, kan téi di sa, zot téi mète an garde kont mové frékantassion mé zot la zamé panssé-é mwin ossi- ké sé noute bande rejeton té i pé égzèrs in mové linflianss dsi lé zot.

Touzour lé zote, zamé nou mèm é poitan si lé zote é zanfan lé zot néna défo, nou lé pa égzan non pli nou, é noute zanfan galman.

Alé ! mi kite azot rofléshi la dsi mé mi dispanss azot panssé de zot koté demoune lé bon konm bon bon alé oir lé zote lé amèr konm lo fyèl.

Alé ! Ni artrouv pli d’van.

Sipétadyé.