Mézami kan i di rin kossa zot i oi pou vréman ? Dé lorgane intèryèr sansa kékshoz d’ote. Ote shoz biensir ! si i di rin i pé konprann lo rin konm lo rin guèpe, i pé di ossi lo ba d’rin kan i fé mal.Astèr mi souvien in maloya téi di bann parol konm sète mwin la marke an-o la. Bonpé marmaye téi shante dan kar kan l’apré bate karé é shakinn téi pète a rir aprésa..

Dann diksyonèr Alain Armand i pé lir in kozman Albany k’i di konmsa : Mon kolé la manke dékloqué é mon zézère la kriye : « A Mon Dyé la kass lo zos ! »... I pouré dir ossi disloké olèrk dékloké mé toute fasson sé pa kékshoz pou aranz in moune mé plito pou déranj ali.

Dann somi lo mo Daniel Honoré i trouv galman zépol la dékloké sansa la dékoké, zonou la dékoké sansa la dékloké. Antouléka sa i lèss pa ou vayan apré i shok dann morsso-la épi d’ote…Alé ! Mi kite azot rofléshir la dsi é ni rotrouv pli dvan, sipétadyé.