Médam zé méssyé, la sossyété, kan néna inn tash pou fèr épi plizyèr pèrsone pou travaye ansanm i fo lo shèf i ankouraz la bann pou travaye. Li di sak lé marké an-o la, sansa li di : « alon mète ansanm ! alon mète ansanm ! » Mi souvien kan la komanss fé la kaz an béton é kan téi falé koul in dal l’avé touzour, dann tan, plizyèr dizène pèrsone pou travaye ansanm pars la dal téi koul in kou dopi komansman ziska la finission.

Té i falé antann lo dézorde..In bon dézord mi panss pars sa téi fé avanss lé shoz.

Lété konmsa dann tan la min dé l’om lété prézan partou.Koméla la mashine i fé bonpé zafèr, sé pou sa néna mwinss moune dsi shantyé alé oir lontan demoune téi grouye konm fourmi. Parèye dann Por,parèye dann bann gran shantyé, parèye sirman kan la fé la voi pou lo trin roulé osinonsa pou fouye la tinèl. Dann tan in lankourajman sa lété sipèr-inportan pou ariv in bon rézilta.

Toute fasson dann in travaye i fo ète ankourajé.Biensir wi pé ankouraz aou par ou mèm, mé lankourajman i pass galman par lé zot. Lo zo i soutien la shèr ! kossa zot i anpanss zot ?

Alé ! Mi kite azot rofléshir la dsi é ni retrouv pli dvan, sipétadyé.