Mézami zot i koné néna d’moune lé kontan kan i ariv d’ote moune kékshoz de bien, é i oi d’apré zot réakssion ké zot lé kontan pou vréman. Ni pé z’ète kontan kan i ariv la sézon bak si nou néna famiye, nové-nyès, i gingn zot diplom é nou néna rézon pars i fo pa anvyé lézot… L’anvi sé in vilin défo, dann la rolijyon i di mèm sa in péshé. Alor zot i konpran bien pou kossa i f opa ou lé anvyeu.

Mé dann la sossyété ni viv, ni apèrssoi, néna bonpé d’moune néna konm motèr la zalouzri. Zalou pars in moune zot i koné la fé in bon maryaz. Zalou in moune la gingn in bon diplôme. Zalou par rapor la réissite lé zot. Donk si zot lé zalou, i manke pa zot i ral lo kèr tèl fasson ké zot i mète dann danzé la réissite lé zote.Kissoi zot voizin, kissoi zot famiye, kissoi in moune étranj mèm si sé in bon moune.

Mé antanssion défoi, mèm lo pli souvan, salé pa volontèr, sé in réakssionlé pa roganizé mé in réakssion spontané. Di pa mwin, an parmi lo moune zot i koné na pwin demoune zalou, demoune i pass zot tan pou krétike lé zot avèk movèz foi… In pé i rode mèm gratèr pti boi pou fé d’tor zot prop famiye é sa lé vréman pa chik in kékshoz konmsa.

Alé ! Mi kite azot rofléshir la dsi é oir si zot i gingn konbate le moune i ral lo kèr dsi loute bonèr par égzanp. Ni artrouv pli dvan, sipétadyé.