Mézami sirésèrtin dann bann kozman kréol rényoné- konm dann toute kozman popilèr- néna pou boir é pou manjé pou informé konm pou déformé, pou fé travaye la tète, pou fé ri la boush konm pou okip sinploman lo tan.

Kozman zordi i sorte dann in lépizode Zistoir Ti-kok par Christian Fontaine pibliyé an fèyton dann Témoignages : Ti-kok i zoué avèk zanlik. Li di kalkil in shif dann oute tète, miltipli par 2, arzoute 40, diviz par 2, artir lo shif ou la maziné é Tikok fyèrman i anonss lo rézilta sé 20. I pé pa tonm otroman..sé la moityé lo shif la azoute an promyé. Zot lé dakor avèk mwin ?

Alor pou rovnir dsi noute kozman zordi ni pé dir Zanlik lé kontan pars li la trouv in n’afèr pou okipe son tan, konm in majigador, é sirman in zé li va ansèrv sa avèk in ote kamarade mé lo rakontèr i di bien sé in zé sinploman pou fé travaye la tète é tourne son moulin pou pa gran-shoz boudikonte.

Alé ! Ni artrouv pli dvan sipétadyé.

Nb-i pé di ossi « gingn soso pou la somenn » sansa « gingn in mash » osinonsa d’ote zafèr ankor.