Mézami, médam zé méssyé, mi panss mi yèmré trouv in mishèl morin dsi mon shomin. Mé kossa sa i lé ? Pou mwin sé in moune lé kapab fèr toute sorte zafèr dann in kaz. Pou diksyonèr Alain Armand sé in bon zouvriyé. Pou d’ote sé plito in zouvriyé gro-doi.

Dann in kaz néna touzour kékshoz pou pozé, pou kolé, pou koupé é la plipar d’tan lo mète dé mézon osinonsa la métrèss néna pwin tro la kapassité pou fèr in rabiboshaz sirtou kan i fo fé sa toutsuite pou toutsuite, alor kèl shanss si ou lé kamarade avèk in mishèl morin.

Konm la shansson i di : « Mon Dyé kèl bonèr, mon dyé kèl bonèr kan ou na in mari k’i brikol. » Antouléka mi kite azot apréssyé in sityassion konmsa sansa non é ni rovoi pli loin sipétadyé.