« Dann boutèye lo ronm i bouz pa, mé sé kan li rant anndan l’afèr. » : in kozman pou la rout.

Médam, zé Méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Mézami mi pans zot i koné déga la boisson i pé fé dsi l’moun. Tou l’moun i koné mé shakinn i rogard plito lo déga shé son voizin, plito ké shé li-mèm . Kan wi domann in moun si li boir, li va répond li boir son dë kou, mé si wi anparl ali son voizin li va di l’ot i boir tro-sansa va di li boir pa li tète. Romark la vi lé konmsa : kan sé ou, wi fé toute pou diminyé out défo, kan sé lé zot wa fé toute sak i fo pou grossi lo défo. Final de konte, kossa mi roprosh la boisson mwin ? Mi roprosh ali fé pèrde amwin mon kontrol dsi mwin mèm sa sé in n’a fèr , mi ariv pa a siporté,sa !Alé ! Mi kite azot rofléshi la dsi é ni artrouv pli d’van. Sipétadyé.