Dan noute kiltir popilèr néna bonpé kozman pou dir sa la éspass dann tan lontan… Mi koné pa pou koué, mé mwin néna dan l’idé k’ni viv in pé an rogardan déyèr nou.Sé konmsa k’i di : dann tan la marine a voil, dann tan lésklavaz, dann tan Zézikri téi marsh kate pate. Mi arète la pars néna ankor d’ote kozman épi déssèrtin ni pé dir lé pa tro répéktyé.

Lé drol noute fasson d’oir lé shoz. Sanm pou mwin in pèp jenn konm la n’ote i dovré d’ète porté an avan plito ké rogarde an aryèr.Si zot i koné pou koué di amwin mé mi diré sé pars nou la viv in listoir kourte mé in listoir dramatik : la moityé noute listoir la spass dann tan lésklavaz, épi l’avé galman la trète, épi lo tan zangazé lété pa gayar non pli, konm lo tan la kolonizassion.

Mèm zordi ni diré noute pèp i viv konmsi i sa ariv ali kéklshoz-konm bann goloi téi panss lo syèl i sava tonb dsi zot tète… Lo pèp rényoné sé in pèp péssimist pars son marsh an avan lé kontraryé par bonpé lanmpèshman politik, ékonomik, sossyal. Pétète pou sa mèm noute monde anou lé souvan défoi pli noir ké tou an limyèr.

Mi kite azot rofléshir la dsi é ni retrouv pli dvan, sipétadyé.