Mézami, zot i koné dann tan d’avan, dann shak famiye l’avé bonpé zanfan é manzé lété ziss a pène sifizan. Kan l’avé in bon kari, la plipar téi sèrv azot konm zot i antan,sak la parti zoué, sansa fé in korvé, kan zot i ariv l’avé prèss pi arien pou zot, sof la soss kari.

Sé pou sa lo patoi i di : « Dèrnyé i goute la soss ! »

Mé si ni oblye in kou lo manzé é si ni arvir dann la sossyété, ni pé dmandé an tan k’provèrb kossa sa i vé dir. Mi panss sa i vé dir, lo dèrnyé lé touzour lo pli mal sèrvi é la ni kalkil kossa téi éspass dann tan d’avan : pou lo promyé la famiye téi fé in éfor késtyonn linz é inn foi ké li rante pi d’dan sé lo dézyèm k’i érite, aprésa lo troizyèm ékan i ariv lo dèrnyé dann linz na pliss rakomodaz ké d’linj é sa lé vré pou bann fiye konm pou bann garson.Donk la plipar d’tan lo dèrnyé lé pli mal sèrvi.

Biensir zot va dir amwin koméla lo tan la shanjé , é lé vré, é dir ké nou lé départman dopi 1946 é nou lé 2025. Sa i obliz anou poz anou késtyon, zot i kroi pa ? Ala ké ni di, dann la sossyété néna in kantité bann dèrny, é mèm bann dèrnyé dé dèrnyé konm in pé i di.

Alé ! ni artrouv pli dvan, sipétadyé.