Mi sorte lir kozman-la dann dikssyonèr kréol-français Alain Armand la ékrir. Li la tir in pti fraz dann in liv défin Daniel Honoré é dann fraz –la téi di konmsa : « Mon fam a koté i dor an kouto fèrmé… akoz in dégou d’lo i tonm pa dsi li ? ». Dann la lang bann franssé i di galman « dor an chien d’fizi ».

O fète, kossa i lé sa ? I paré sé kan wi dor dann la pozission bann pti baba dann vante zot momon-dann la pozission lo fœtus si zot i vé. Mèyèr fasson pou dormir d’apré sak i di.. Antouléka pou sak i gingn dor konmsa.

Mi koné pa koman zot i dor mé parétil néna in bone fasson pou dormir épi in mové fasson, inn fasson wi ropoz bien é inn fasson wi fatig.

Alé ! Mi kite azot rofléshir la dsi si zot i panss sa i vo la pène.An atandan, ni retrouv pli d’van sipétadyé.