Mi pans sa i doizète in provèrb russ. Sa lé sirman pa in kozman rényoné pars issi shé nou, lo lou lé rar konm korn lapin. An touléka li di bien sak li vé dir ; li vé dir wi pé drèss in lou mé ou lé pa sir, dann fon son koko, épi dann fon son kèr, li lé kontan sak ou la fé avèk li. Pétète li vé sinploman artourn konm li lété avan..Sa i rapèl amwin in ga mwin la bien konu :son famiy la bien édik ali, la bien form ali. Etan adilt li la pass konkour épi li té rosi é li l’amenn in n’ot kalité la vi :bien sou tou rapor, frékantan de moun bien , bien péyé, indéksé , goumanté pou la vi shèr. Mé in zour la date la rotrète l’arivé, li la fé in boukan koté son kaz, li la soign dé troi zanimo épi li téi sava rode la paye pou zot . San di arien pèrson e li la ropran son vi d’avan an rogrétan tout lo tan pou li, tan pèrdi .Alé ! Mi kite azot rofléshi la dsi é ni artrouv pli d’van.Sipétadyé.