Mézami zot i koné siklone avèk kou d’van sé kaziman la mèm shoz-konm bann vyé téi di « sé topète-morète boi d’zalimète. » Poitan ni koné néna siklone delo épi siklone lo van, siklone sèk avèk siklone mouyé mé dann tan lo moune téi anbarass pa zot avèk so bann nyanss.

Alor figuir azot in pé kèl figuir in moune i pé fèr landomin siklone osinonsa kou d’van : sépa si zot oi rapèl zot figuir apré siklone bilal, sansa apré siklone Garance kan zot la vi toute déga siklone la l’avé fé. Azoute ankor avèk sa lo manke somèye, épi la pèr lakaz i kass é zot va konprann zot téi pé pa bon figuir.

Astèr si ni trouv in moune la figuir lé dékonpozé sa i vé pa dir la vèye l’avé in siklone mé sa i vé dir la pèrsone lé dann in movèz pass kissoi la maladi, kissoi lo stress, kissoi ankor in kou d’shagrin si tèlman li fé pa bone figuir. I pé mèm dir li lé dsou lo shok.

Alé ! Mi kite azot rofléshir la dsi é ni rotrouv pli dvan, sipétadyé.