Mézami souvan défoi ou na in bon kamarade é oute kèr i fé mal kan wi oi la fasson li amenn la vi … Défoi ou néna la krintiv l’avnir sar pa roz pou li pars toute son n’afèr sé l’amizman é an plis pa l’amizman an modèrassion mé labizman dann lamizman.

Ou la bo dir arète abiz dsi toute bone shoz mé wi gingn pa fé antann ali la rézon pars zot dé lé kapab fashé é antann ali dir aou in onm sé in onm sansa ou la pa son papa ni son momon-l’èrla oute kèr i pé ségné mé sa i fé pa li arien… Sof pétète sonkèr ali i sègn ossi pars wi aprouv pa li.

A ! wi pé dir ali in kozman k’i fash konm tèl k’i amene la vi an dégréné zordi, lé riskab domin na pi lo dan pou manz graton- mi panss zot i koné kossa sa i vé dir. L’èrla wi anval oute mo pars i di bien anval in mo sé garde in zami… Konm lèss in mo alé sé pèrde in zami.

Final de konte lé pa fassil fé pass in moune dann shomin li la pa shoizi-dizon l’édikassion an zénéral sé in kékshoz difissil é mi kite azot roflèshir la dsi an atandan pli dvan, sipétadyé.