Mézami mi panss zot i koné kozman–la , é mwin lé sirésèrtin madré konm zot i lé mi oi pa zot apré tonm dann in pyèz konmsa. Pars lé bien vré si wi ashté in shate sé pars ou la bien bézoin ali é si apré li gingn pa rann lo sèrviss wi atann de li ou la pa fé in bone afèr.

Kèl sèrviss ? sinploman fé kour lo ra sansa tyé azot.Lé vré koméla néna poizon pou lo ra é wi pé mèm alé la méri pou domann bann sassé dori anpoizoné.Mi di pa sa lé pa éfikass,mé antanssion konm i di kouto dë lam pars shakinn néna son rol : li pé z’ète in bon n’afèr konm in mové. Pou mwin ziska zordi mi panss kan ou néna in shate sé lo moiyin d’lite lo pli éfikass konte lo ra

Domaz zot i tyé zoizo mé ni koné bien dann toute mal néna in bien é vèrssi-vèrssa.. An touléka pou lite konte lo ra mi oi sa lé valab.Mèm si lo shate l épa ou, pars li vizite oute kour, li fé la rovnde é momandoné wi apèrssoi lo nonm lo ra i diminyé.

Sé pou sa si wi ashté in shate pou son itilité pa pou sa boté i fo wi koné langajman wi pran é lo bon sèrviss wi pé atann.

Alé ! Ni rotrouv pli dvan sipétadyé.