Médam zé méssyé, zour konm nuite, dopi la kréassion ziska zordi la mèr i bate é li lé pa paré pou arété. Na poinn volonté imène i pé anpèsh in n’afèr konmsa pars sa lé dan la natir.

Sa lé konm kozé, fé ladi-lafé, bate la lang san arété, sa sé in privilèz l’imanité épi son péshé d’néssans, é sa ossi toultan ké néna demoune, sé in n’afèr va kontinyé,avèk lo bann kozman initil, lo bann médizanss, lo bann kritik san fonnman.

Défoi, pou in rézon ké wi koné pa, ou lé pri dann in tourbiyon konmsa é lé pa agréab ditou.Wi yèmré bien sa i arète mé wi gingn pa fé arété. Lo myé sé d’lèss kozé é pa fé in konte ansanm. Lo myé sé d’lèss la mèr bate. Kékshoz wi pé pa anpèshé i vo myé wi fé avèk .

Alé ! mi kite azot rofléshir la dsi é ni retrouv pli dvan, sipétadyé.