Mézami, mon bann dalon, si mi anparl azot zordi demoune néna bone boush sé pars issi La Rényon demoune i yèm bien manzé boir bann bone shoz. Mi rapèl i vyé gramoune mwin la konu téi di konmsa : « Mi ve manj in pti pé, mé de bone shoz ». Romarke anou bien kan li téi di « de bone shoz » pou koméla sré dé shoz sinp,fassil pou trouvé dann marshé forain osinonsa dan la boutik avèk in bon gou épi i pass bien sou la dan.

Astèr kan mi poz amwin in késtyon konmsa, mon idé i ranvoye amwin ziska dann tan mwin lété marmaye-dann tan mon marmayité- mon anfanss si zot i vé, kan la kuizinyèz téi fé kui bon manzé, assé pou kontante anou, é pétète galman ranpli noute boujaron d’ti mamaye. Ma m’man téi di intèl i rafol tèl-shoz, tèl-shoz.Mé mon patèrnèl téi disinploman la fain sé sak i done lo bon gou bann shoz ni manz. Do kwoi fé travaye noute tète , zot i kroi pa ?

I paré dann la lang bann franssé néna dê mo k’i di pa la mè-m shoz :si mi di mwin lé gourman sa i vé dir mwin sé in goulipia, mé si mi di mwin lé gourmé, sa i vé dir mi yèm bone shoz donk mwin néna bone boush. Mi panss zot i suiv amwin astèr ?

Mi kite azot rofléshir la dsi é ni retrouv pli dvan, sipétadyé.