Zot i koné issi ba shakinn néna son morfolozi.In pé lé pti, in pé lé gran, in pé lé ron, d’ote lé mèg konm in zaran.

An parmi sak lé gran néna bann kass papaye san golète. Zot i koné in pyé papaye i grandi pa d’in kou sa. Li komanss mèm doné kan li lé pti sansa moiyin é momandoné li grandi si tèlman ké si wi vé kass ali, ou néna intéré d’ète gran.

Kan ou lé gran é ké wi gingn kass papaye avèk la min, mèm si lo frui lé an-o laba, l’èr-la i di ou sé in kass papaye san golète- ou lé gran konm in zour san pin, osinonsa in gran sipaye, in gran zingade. Lo kontrèr sé in pti nin, in pti bouskote, in prti moune… Néna d’ote ankor assiréman.

In zour dann travaye mwin téi doi oir in madam Gringalet.Demoune la parti rode aèl é kan in pti madam l’arivé, mwin la di : « Bonzour madam Gringalet ! » é el la di : « Wi koné amwin don ? »

Devine –devinaye, ni retrouv pli dvan, sipétadyé.