Mézami koméla i fé toute in nyanss rante lo lanalfabète épi lo moune ilétré. Boudikonte ni koné sa lé pa parèye mé mi arète tèr-la pars sé dé shoz lé pa agréab pou koz déssi. I fo dir pou la zénérassion konm mwin, nou la konète demoune téi koné pa lir ditou pars la pa parti lékol in grin. Mi yrapèl in ga téi di konmsa li la parti lékol dovan la porte mé pa anndan.

Kan téi di d’in moune li lir zoinal tète an ba, sa téi vé dir la pèrsone i koné pa lir. Mi rapèl in shanté téi di : « Amwin mèm Kazimir, mi koné pa lir, mi koné pa ékrir. Pou lir mon zoinal konm i fo, i fo li lé ranpli foto ». Mi rapèl pi kissa téi shante sa, mé néna lontan pars tan-la mwin lété kaziman jenn - jan.

Mi yèmré dir zistoir-la lé lwin déyèr nou mé malorèzman lé pa vré ankor vi k’sa sé in voiyan i klèr ankor an rouz zordi konm d’ote voiyan malgré in loi d’déparmantalizassion i romonte l’ané 1946.

Mi arète la pars mon rol sé d’amize in pé l’moune é d’évite tro koz sèryé. Donk mi kite azot rofléshir la dsi é ni rotrouv pli dvan,sipétadyé.