Mézami yèr mwin té apré ékoute lo résponsab bann shagossien Olivier Bancoult, é mwin la antann ali di kozman-la konm de koi in pèp san kiltir sé in pyé d’boi san rassine é bien antandi konm toulmoune sa sé in kozman i invite a réfléshir. A réfléshir pars sé inn fassonn d’dir la kiltir sé kékshoz lé fondamantal pou toute bann pèp konm la note dann son roshèrch lidantité.

Astèr si i kalkil bien, si i fé la rolassion rante l’om épi lo pèp, mwin lé sirésèrtin l’om lé pa solman ékonomik, li lé galman kiltirèl, li lé politik épi sossyal é lé inportan pou li- sé in lansam konplé d’apré mwin avèk bann zinterakssion rante toute bann facettes son légzistanss.

L’èr-la ni pé dir si in pyé d’boi na poinn rassine li lé riskab mourir mèm si bann pyé d’boi , déssèrtin, néna d’ote fasson pou dévlope azot ké bann rassine sinploman kansréti par lo vert bann fèye- la klorofile-, sansa lo bann pti branshman zot i établi avèk d’ote plante konm bann zépifite- konm la vaniye i konèkt ali avèk bann plante konm pyé boi d’shandèl, sansa lo poiv konèkté avèk bann bransh mang ou bien d’ote.

L’om konm lo pèp sé in lorganism konplèks ki pé viv épi dévlopé ké si néna in linterkonèkssion rante bann zéléman inportan d’in sossyété.

Alé, mi arète tèrla épi ni retrouv pli d’van sipétadyé.