Mézami mi koné pa si mo-la demoune i ansèrv ankor zordi mé si i ansèr pi lé bien domaz. Pars kaloubadia sa sé in pti trafik wi fé san fé romarke aou.

Pou kossa ? Pars zénéralman, sa sé in n’afèr lé interdi.Kan mi di sa mi panss toutsuite shevrète wi sava trape dann la rivièr mèm si sa lé défandi par garde-foréstyé.wi pé galman vann pti zoizo trapé a la kol touzour an kashète la loi.

In zistoir i rakonte dann noute famiy : mon tonton té in gradé dann zo-zé-foré é réputé pou sa sévérité .Donk in zour in fézèr d’kaloubadia i pointe la kaz mon gran-mèr é li oi mon tonton lé la. Mon gran-mèr i di : « Mounoir kossa wi vann zordi ? ». Lo ga i manke toufé kan li oi mon tonton épi li larg dann in pti filé d’voi : »folaye ! » épi li sé d’démaré pou pa fé souke ali avèk son kaloubadia.

Alé ! mi kite azot rofléshir la dsi é ni retrouv pli dvan,sipétadyé.