Mézami, mon bann dalon, kan zot i antan kozman-la , sirésèrtin zot i mazine la solidarité d’moune dan noute péi sirtou pou la késtyonn manzé. Ni pé raprosh sa avèk lo kozman : « in boushé manzé sa i rofiz pa »- in provèrb noute solidarité.

Lé étonan kèl plass lo manzé i tienbo dann linivèr d’moune La Rényon. Lé konmsi la késtyonn la fain lé touzour prézan dann mazinassion kréol. I diré noute pèp néna souvnanss la fain li la soufèr yèr é li néna déza dann son tète la fain li va konète domin. Zot va dir amwin li lé rante dë fain ? Mi panss lé possib pou in bann rézon lé garoté avèk noute lékonomi épi noute listoir.

In zour mwin la antann in médssin apré dir lo rényoné i manz tro, sé pou sa momandoné li lé an sirpoi. Domaz li la pa fé lo raproshman avèk noute listoir mé mwin pèrsonèlman mi koné lé shoz i ariv pa konmsa par azar é dann toute sak i ariv i fo touzour pran konte la pate d’listoir.

Alé ! Mi kite azot rofléshir la dsi é ni retrouv pli dvan sipétadyé.