Mézami,mon bann dalon,

Mwin lé sirésèrtin zot i koné sa pars sa sé in fraz i sorte dann maloya otantik. Bien antandi nou la antann sa dann bann kan sansa dann bidonvil kissoi dann Por, kissoi dann sid, kissoi ankor laba Sint-Sizane osinonsa Sin- Bénoi anfinnkonte in pé partou La rényon avèk bann gramoune mémoir vivan noute maloya épi passèr d’mémoir pou bann zénérassion nouvèl.

Kissa i koné pa zordi ankor Gramoune Lélé,Gramoune sello,Firmin viry, épi d’ote ankor mi di pal o nom mé ni doi azot bokou la rokonéssanss pars zot la prézèrv in trézor noute patrimoine. Tanmyé ankor si bann zassimilatèr la pa vnyabou détruir in bijou noute kiltir rényonèz é si noute pèp la vouli toute fors konsèrv sa vivan.

Lo 21 moi d’juin sé la fète la mizik é so zour-la ni mank ar pa mazine noute bann gramoune pars nou lé rokonéssan é banna i mérite vréman noute rokonéssans- ni obliye ar pa non pli lo gran rol noute parti la zoué … Zordi maloya lé rokoni par l’unesco.zordi bann nouvèl zénérassion i kontinyé fé sone lo bob, lo kayanm, lo pikèr, lo roulèr é bann voi éspéssyal i rézone in pé partou.

A pli dvan sipétadyé.