Zot i koné la mori sa i vann dann komèrs é li la pwin la tète.Si wi rode la tète-la, ou lé pa arivé, ou lé riskab pa trouv arien. Rode sa sé rode linpossib.i pé dir ossi ; rode sa sé kour apré in n’afèr imazinèr-in « chimère »

Dann kartyé troi lète, in liv Axel Gauvin la ékrir i trouv fraz-la : li la kontant bann marmaye, li la anbloui azot, la fé kour azot déyèr la tète la mori. Dizon déyèr kékshoz i fé rèv aou mé sa i égziss pa dann la vi toulézour.

Mi panss, konm mwin, zot la konète étan marmaye in rakontèr d’zistoir i fé oir sak i ékoute kékshoz gayar, mé kékshoz i égziss pa.Mazine azot bien, mi panss zot ossi zot la konète sa.

Alé ! mi kite azot rofléshir la dsi é ni retrouv pli dvan, sipétadyé.