Médam zé Méssyé, la sosyété, koz èk moin s é koz èk in kouyon, mé sé o pyé d’lo mir k’i oi lo masson. Mézami, souvan défoi demoun i yèm rann vizite demoun dan lo malèr. In bone intansyon an vérité, mé néna fasson é fasson koz èk demoun dann difikilté. La plipar d’tan mi krin k’i révèye la soufrans demoun kan wi késtyone azot.Moin pèrsonèl mi profèr pa anparlé, pa par indiféranss, mé par pèr goumante la soufranss. Lé vré, la pèrsone dann lo malèr la bézoin kozé, la bézoin konète néna d’moun pou partaz son malèr, la bézoin konm k’i diré son térapi,mé la pa an rakontan san sinkant foi, san sinkante fasson,an razoutan é an razoutan, la pa konmsa la plé va sikatrizé.. Sé pou sa sanm pou mwin koz iavèk in mound si son malèr, sé razoute in boute shak foi.Sé pou sa, solon mwin, néna fasson é fassonn rakonté :néna la fasson k’i ède lo boubou pou sikatrizé, é néna la fasson i mète lo boubou a nu. Alors,antansyon-antansyon nout kozman lé marké an-o la. Alé ! mi kite azot rofléshi la dsi é ni artrouv pli d’van. Sipétadyé.