Mézami, zot i koné, dan la vi, néna dé zour sé zour d’shanss,mé d’ote sé dé zour d’shiass. Kan sé in zour d’shanss wi atann in bone nouvèl é sé in bone nouvèl k’i ariv, lé gayar pou vréman. Mé kan sé in jour d’shyass é ké wi atann in bon nouvèl alé oir sé in mové nouvèl k’i ariv, l’èr-la oute kanar lé noir.

Zot i koné toulmoune dan la vi néna bann pèryode lé diféran konmsa é si nou néna la mémoir ni rapèl bien toute bann pèryode tou akabi nou la gingn dann noute vi. Mé astèr mi domann amwin pou kossa i di lo kanar lé noir. Lé vré ni koné in pé toute kanar néna La Rényon kissoi kanar maskarin, kanar Manille,kanar batar, kanar blan néna ossi mé lo pti i sorte déor.

Mi koné an prinssip pou la Rényon blan sé in bon koulèr, é noir sé in mové koulèr mé zot i konpran bien kan wi di dé shoz konmsa i fo wi porte antansion, i fo wi pran prékossion pars sa i pé z’ète mal interprété.

Antouléka si inn an parmi zot i pé ésplike amwin listoir lo kanar noir mwin sré bien kontan avèk zot é ni retrouv pli dvan, sipétadyé.