Mézami, mi panss zot i koné kozman-la é kossa li vé dir égzaktoman. Sirésèrtin kozman-la sé in linvitassion é an mèm tan in règ de vi an sossyété : pou mwin sa i vé dir kan nou lé né la politèss lété déza la, sé pou sa ni doi réspèkt provèrb-la.

I di ossi lo mèrsi lé né avan nou : sa sé pou fèr romarke in pé i fo pa obliye di mèrsi kan in moune i done aou in n’afèr sansa i fé in n’afèr pou lou.

Mwin pèrsonèlman mi rogrète koméla la politèss lé pa konpri dann bann règle de vi kaziman obligatoir konm avan, poitan mi panss li rouvèr dé porte, antouléka li anpèsh bann porte rofèrmé, é sé pou sa ni doi pa néglij ali.

Mi kite azot rofléshir la dsi é ni retrouv pli dvan, sipétadyé.