in kozman pou la rout

« La trass in kankrola i gate in kilo do sik. » : in kozman pou la rout.

Justin / 24 désanm 2020

JPEG
Méssyé zé Dam la sosyété, koz èk mwin sé koz èk in kouyon mé sé o pyé d’lo mir k’I oi lo masson. Mézami, mi koné pa si l’ariv azot in n’afèr konmsa in zour : mi souvien dann tan-la I romont in pé loin, demoun la invite amwin zot kaz:manzé té bon, té korèk,lo déssèr lété valab, mé kan l’ariv lo kafé, sé la ké la koup la manké. Mwin la vi lo sik lété in pé rouz-rouz mèm jone mé konm mi boir pa kafé san sik, mwin la pran o moins dé pti kiyèr do sik. Sirpriz-sirpriz kankrola té fine zoué d’dan. Kan mwin la komanss boir lo kafé mwin la romark l’avé in kékshoz k’I klosh pa. Mé ou lé lakaz demoun, ou lé in pé timid, kossa ou I fé ?Ou I boir lo kafé kant mèm mé Baya, lété dir ési tèlman dir ké lo manzé li mèm I diré li la sort par dsou pou li romont par dsi é sé konmsa ké li la pass par l’né. Kaziman mwin la toufé.Mi less azot dovine la suite..Mé nou lé dann in proverb-la proverb-la kossa li vé dir ? Sinploman I sifi in gatèr pou tyé in l’anbyanss. I di galman in moush a vèr I gate in kari salé é zot I romark in kozman konmsa néna dann tout kalité lang donk gatèr néna partou é problèm sosyété galman .Sé pou sa mi less azot rofléshi la dsi é ni artrouv pi d’van. Sipétadyé.