Méssyé zé médam, la Sosyété, koz èk mwin sé koz èk in kouyon, mé sé o pyé d’lo mir k’i oi lo masson. Kozman-la kan mwin lété pti mwin té i antann sa souvan épi in pé dann tout zokazyon. Biensir sa i fé pans amwin lo tan l’armé, kan in pé téi fé lo malad pou rotourn zot kaz.Désèrtin mèm téi amenn sèrtifika doktèr.Tazantan sa téi marsh épizapré ou téi oi azot dann shomin apré bouzé konm ou é konm moin. Mé toulmoun i gingn pa fé konmsa, in pé téi ésèye épi téi gingn pa. lo zistoir k’i vien dann mon tète té sète Bik-bok, in zistoir pou rakont dsi galé:Bik-bok néna in lyèv é li vann sa kat foi, kat prète diféran, épi li trap son lyèv li sava kui pou manzé. Mé oila, bann prète la port plinte é li lé konvoké par tribinal. Son l’avoka i di ali :ou na ka réponn tout késtyon an dizan Bik-Bok sak i fé lo ziz i panss li lé fou é i kondane pa li, mé kan lo lavoka i domann son pèyman li fé konmsi li konpran pa, é li réponn Bik-Bok pou toutt késtyon ziska ké l’avoka li mèm i tir in tré dsi l’afèr. Alé ! Mi domann azot rofléshi la dsi é ni artrouv pli d’van. Sipétadyé.