in kozman pou la rout

Lo zyé lo mètr i angrèss zanimo !"

In kozman pou la rout

Justin / 28 novanm 2020


Mésyé, Médam, la sosyété, kroir amwin sé kroir in kouyon, mé sé o pyé d’lo mir k’i oi lo bon masson. Figuir azot kozman-la moin la antann mon papa di sa konbien foi, mi rapèl pi. Dann tan li té i songn koshon, dann tan li l’avé bèf, mèm kan li l’avé in pti basskour.. souvan défoi moin té i pran sa pou mwin, pars kan momon téi anvoye amoin donn manzé poul, moin téi fé vite konm di Madoré pou gingn alé zoué la bite. Aprésa ou téi antann:kissa la done manzé poul épi la pa done dolo, kissa la obliye donn manrzé bann zanimo sak lé in pé faye. Mwin téi antann galman:in pé i vé manz volaye mé i done pa man zé ! Mi pé dir azot mwin téi gingn gro tète kan mwin téi antann sa. Mé mi pans kozman-la sa i aplik pa solman pou lélvaz zanimo, i aplik galman kan ou lé résponasab in travaye sansa in biznèss. si wi port pa antansyon konm k’i fo kapitol lé pa loin la rosh tarpéyène. Mi kite azot rofléshi la dsi, mé obli pa pèrsone i féra pa out plass, sak sé ou k’i doi fé. Ni artrouv pli d’van,sipétadyé.