Mézami l’ariv amwin dann mon éskolarité kotoiye bann marmaye néna bone tète. Mi rapèl inn téi konpran toute pli vite lé z’ote, téi rotien toute pli vite galman si tèlman li téi pé ésplike toulmoune kékshoz mèm difissil la métrèss téi vienn éspliké in néstan avan. Pou ma par mwin téi kontante amwin d’ète dan la moiyène bann marmaye mon klass é mwin té i soussyé pad sa.

Bone tète sé bone intéllizanss, bone konpréanssion, bone mémoir, bone kapassité pou réstityé konm i di donk roésplike l’afèr konm la fé avan li. Final de konte in marmaye konmsa sé in plézir pou in proféssèr in réyon d’solèye dann in syèl kouvèr, in gayar moman dann son zourné.

Astèr la késtyon mi poz amwin souvan sé pou kossa néna marmaye bone tète épi d’ote lé pa kouyon-kouyon mé lé mwayin é mèm d’ote lé kaziman boushé.Mi poz amwin késtyon mé mwin la pwin d’réponss pars pétète la pwin d’règloman dann sète afèr-la. Toute fasson l’imin la pa in mashine. Mi diré pa sa i ariv par azar mé i ariv é i gingn pa ésplike in fénomène konmsa.

Alé ! Mi kite azot rofléshir la dsi é ni retrouv pli dvan sipétadyé.