Médam, zé Méssyé, la sossyété, zot i koné bann franssé i di konmsa : « la kolèr lé movèz konséyèz » é dann kozman kréol ni rotrouv anou mèm pwin kan i di mète in galé dsu. Mi oi sa konm in konssèye pou apèz la kolèr pars si i apèz pa li , li lé riskab fèr d’tor kissoi lo moune an klèr, kissoi son lantouraz.

I paré lo gran fonnkézèr Beaudelaire téi di : « Arète aou mon doulèr épi rèss trankil. » .An dizan sa li koz avèk son doulèr konm dann kozman kréol i pé koz avèk la kolèr pou apèz aèl in pé.. I di galman : « Mète in galé dsi oute kèr ! » mé bien sir sa i vé pa dir mèm shoz ké sak nou la mark an-o la.

Alé ! Mi kite azot rofléshir dsi bann kozman-la si zot i vé osinonsa si zot i éstime sa lé itil é an atandan ni retrouv pli dvan sipétadyé.