Mézami, fitintan, mi koné pa si zordi sa lé vré ankor l’avé in patoi demoune téi di sa partou, pou toute sorte rézon, mèm san rézon pars sa téi aporte in n’instan dékontraktan. Aprésa in n’ote patoi téi pran la plass ,alé konète pou kossa, épi in n’ote ankor é la vi téi kontinyé konmsa. Déssèrtènn foi sa téi fé lo tour d’lil san obliye lé o.

Dann tan-la demoune téi viv anparmi épi téi fé konkour kassaz ti-boi,sansa konkour plézantri. Zordi mi koné pi si sa i fé ankor. Si sa i fé ankor mwin lé pi o kouran-sé sa vyéyir… Antouléka mé sa i romonte lwin an aryèr kan demoune téi lanss kozman mwin la marke an-o la.

Sa téi ariv kan lo kamarade l’apré fé in zèss asuiv in pé énèrvan konm bouz la zanm san arété, konm fèr lo brui avèk in léstilo, konm zoué dann son dan avèk la lang épi fé tyok-tyok shakinstan épi d’ote tik-tak ankor... Pou fé arète ali avèk son tik, inn dann la konpagni téi di : « Mi koné in moune la fé sa san-t’an,apré lé mor ! ». Sa l’avé assé pou fé arète in moune in pé d’tan, apré lo tik téi ropran.

Alé ! Mi kite azot rofléshir la dsi épizapré ni rotrouv sipétadyé.