Mézami, zot i rapèl lo mo kazou ? Mi anparl pa bann vyé roshé konm mwin mé la zénérassion d’apré. Si mi di kazou, kossa zot i oi dann zot mazinassion ? Sinz ? Bin sa mèm. Dann tan toute sinz té kazou pou nou-dann zardin d’léta l’avé in kazou..mèm si bann marmaye sovaz téi fé mizèr ali. In moune té pa dan lé norm avèk bann tré in pé kass kassé, demoune téi kriye azot kazou.

Anfin sa lété dann tan ! Antanssion pa toulmoune té sovaz dann tan, é l’avé sak té sovaz é sak lété pa.Konm zordi si zot i vé !Pars zordi ankor la rass sovaz lé pankor mor. Mé dannn tan nou téi koz konmsa ! In moune vilin téi kriye ali kazou.Soman la réponss lété toute fète é téi di konmsa : « Momon kazou i trouv son pti zoli ! ». Antouléka si èl téi trouv pa zoli pars zoli koman i di dann langaz kazou ? Ni koné pa mé i pass pliss lo tan avèk li sak nou lé sir sé k’son fasson d’fèr avèk son prozénitir i amontr li trouv banna émab é sa sé léssansshyél.

Émab pou kossa ? pars in momon i agarde son pti avèk lo zyé lo kèr é na pwinn méyèr zyé ké sa, néna pwin d’fasson pou bien rogardé ké so zyé-la. Sanm pou mwin dann in famiye si néna in zanfan in pé kontrofé, sirésèrtin lo momon i pass pliss lo tan avèk li. É sa lé normal. Astèr domann ali si li préfèr inn an parmi son bann zanfan, li va réponn li yèm toute parèye é s alé normal bien antandi.

Na pwin lontan mwin la lir kékpar in gran lantrénèr foutbal l’avé in zanfan malade épi momandoné lo zanfan la mor é zoinalist la domann ali si li lé shagrin, si la mor son zanfan i fé mizèr ali. Li la réponn li lé kontan son zanfan la pass avèk son famiye in bon koupe de tan : la prèv wi pé èm kélk’in wi koné li tarde pa pou alé.

Mi kite azot rofléshir la dsi é ni retrouv pli dvan sipétadyé.