Médam,zé méssyé, la osyété koz èk moin sé koz èk in kouyon mé sé o pyé d’lo mir k’i oi lo masson. Mézami, zot i koné néna désèrtin mélon d’eau sa lé bèl mèm é pou porté ou la bézoin dé min, Tanka port dé dann in sèl min mi panss t’in mové rèv é mi pans pa k’in moun normal i pé majine in n’afèr konmsa fézab.. Mé boudikont kossa kozman-la i vé dir oziss ?:mi pans sinploman li vé dir fé sak wi ging avèk lo bann moiyin ké ou néna. Provèrb-la sa in provèrb bèrbèr é lé normal li parl mélon pars dann bann péi- bèrbèr l’afrik di nor i plant bonpé pastèk-pastèk épi mélon d’eau sé topète morète. Lé vré ké dann shak péi, épi dann shak lang la kiltir popilèr konm bann provèrb épi d’ot kalité la kiltir popilèr sa i fé avèlk sak ou trouv sir plass konm zanimo, fuit, léguime, plante épi bann zabitd lo moun néna.. Mi oi pa nou, rényoné, apré mète an sène in lipopotame, sansa in rinoséros dann nout kiltir popilèr. sof si ni anprète sa avèk lé z’ot., Sansa ankor dann télé.mé zot i panss avèk télé néna ankor moiyin pou moiyéné dann la kiltir popilèr zot ?. alé ! mi kite azot rofléshi la dsi é ni artrouv pli d’van.Sipétadyé.