Mézami si in moune i di azot « kan poul nora lo dan » konsidère i di azot lo mèm zafèr ké la sin-glin-glin. Konsidèr sé in n’afèr k’i ariv ar pa zamé.

Mé o fète pou kossa in moune i pé dir in n’afèr konmsa ? Sirman pars li oi pa sa konm kékshoz possib sansa li vé tèlman ké sa i ariv pa ké li ranvoye l’afèr a zamé… Kozman-la, néna lontan mwin la fine antann dir sa, alé oir pétète mwin lété préssé k’i ariv mé d’ète préssé sa i vé pa dir i sava arivé.

Mwin la koni in moune tou lé matin kan li lèv, li panss zour-la li sa trouv trézor, é biensir lo gran zour la pa ariv zamé. Mé li té si tèlman sir d’li ké finalman landroi la diviz an dë : sak téi kroi li la trouv trézor, é sak téi kroir li la pa trouv trézor.

M’a dir azot in n’afèr, mé alé pa répète toulmoune, kan li lé mor in nuite demoune la vni kass son tonb pou oir si l’avé l’or l’arzan dodan. Mé ofon, pèrsone té koné pa, mé mi di azot in zour va konète é zour-la poul nora lo dan.

Mi kite azot rofléshir la dsi é ni rotrouv pli d’van, sipétadyé.