Mézami kozman-la mi rapèl mwin la antann sa dopi étan pti. Ni pé dir sa sé in kassaz pti boi konm zot i koné kréol i yèm kass pti boi.

Ofète mi sorte lir dann in lépizode Zistoir Tikok in léspréssyon in pé parèy mé téi di : « Tikok wa vnir in onm si borèr i manj pa ou ». Ofète zot i koné borer kossa i lé ? Sé in n’afèr i détrui lo kann kan papiyon i ponde dedan. Si ni rogarde dann dikssyonèr Alain Armand ni oi sé in parazite kann i fouye lo trou dedan.

A par k’sa lo kozman konm zot i romarke zot mèm sé inn manyèr pou plézanté alor wi pé vèkssé, konm pa, mé si wi vèks dizon wi pèrde oute tan pars li invite anou pa mète anou an kolèr mé pran lé shoz an bone imèr.

Alé ! Mi invite azot rofléshir la dsi é ni retrouv pli dvan sipétadyé.